خانه / زنانه ها / 

چایدا خاتین – اشرف/ رقیه علیقلیان (لاله)



چایدا خاتین – اشرف/ رقیه علیقلیان (لاله)

قادینلارین دردین، غمین، حسرتلرین، غیرتلرین، شوجاعتلرین عصیرلر بویو یازماق قوتارماز کئچمیش زامانلاردا عایله لرین یاشاییشی چوخ چتین اولاردی، هر ائوده سو اولمازدی، یاناجاق یا اودون اوجاغیدی یادا سورالار نفتی پیلته. یاندیراردیلار بئله وسایل لریله قادینلیق چوخ چتینیدی، مثلن گلینلر سحر تئزدن آزان وئریلنده هامیدان قاباق یوخودان دوراردیلار، قاینانانین، قایناتانین آفتاهاسینی دولدوراردیلار، جنامازین آچاردیلار، سونرا تولامایا کومور قالاییب اودووروب تولاردیلار قیزارسین. سونرا اود سماورینه توکردیلر هی پوپلردیلر کومورلر قیزارسین، کومورلرین توستوسو گوزلرین قیزارداردی سماورین باشینا کره نی قویاردیلار تاسویو قینه سین. تا عایله یوخودان دوروب چای چوره ک یئییب کیشی لر ایشه کئت سینلر ائله شام ناهارگوزارانی دا بئله اولاردی.
بوزامانلاردا بیرائوین گلینی اشرف آدیندا ماوی گوزلو ساری تئلی، گونش قاباقلی، بال دوداقلی، بیرگلینیمیش هرگون ائوده سو اولمادیغینا گوره قاب قاشیغی ییغارمیش دولچالارین ایچینه آپارار محله نین باشیندا آخارچایدا یویار یویوب قورتاراندان سورا ایستردی کی چایدا دورولاسین سو قاشیقلاردان بیرایکی سین گوتوروب آپارارقالانین یئغار دولچانین ایچینه قایتارار ائوه.
بایرام آیینین سون گونلریدی قارینین دَوه سی قیزمیشدی قارکوله لیردی او سویوخ هاوادا یاش اللری دونوب دولچالارین دسته سینه یاپیشار، اشرف آغلیا – آغلیا ائوه ساری گلر. یئتیرماق هامان قاینانا سی دییر اوشاغین اؤزون باتیریب اونون یئرینه باخ، تز اول ناهارا قوناغیمیز وار کَتدن باجیم گیل گلیر گوتور ناهار قوی اَل دَبد اشرف دونموش اللریله بالاسین راحاتلار گلر غذا قویماغا قاینانا قابلاری دؤزر چکییه سولاری گئت سین گورر قاشیقلاردان آزالیب دییربه قاشیقلار نه اولوب؟ اشرف قورخا، قورخا دییر سو آپاردی به من نئجه الییم؟ هوشون باشیندا دئییردی منیم اوغلوم کاسیبدی قازانجین گونده، گونده قاشیق پیچاغا وئرنمز. نئچه سینی سویا وئریب سن گئت ده دن ائوندن گتیر اشرفینده ده ده سی یوخودو آناسی دا قاپیلاردا ایشچی لیگه گئدردی اَلی هریئردن اوزولموش، گلین باشلیر آغلاماغا. قاینانا دئییر قیز بس سنن دئییرم. تزاول گئت گتیر یاپیشیر قولوندان اوتورور چوچه یه. زاوالی گلین ناچارلیقدان گئدیر همسایانین ائونه دئییر خانیم باجی دؤرد دَنه منه قاشیق وئررسن آخشاماجان آنام گلر اونان آلیب وئرَرم همسایا دئیر آرتیق قاشیق یوخوموزدور. گئت سویون تکین آختار بلکه باتیب چایین تکینه. اَلی هر یئردَن اوزولن گلین ناچارلیقدان یونه لیر چایا ساری اَرین کوته یینین قورخوسوندان قاینانا نین دیل یاراسینین دردینن ناچار حالدا چایین، باشینا چاتیر قار اِله یاغیردی کی گوز گوزو گورموردو. چایین باشیندا
هئچ کس یوخودو. سویوخ هاوادا اَللرین چکیر چایین داشلارینا قوملارینا چای داشقین گلیردی حیرسیندن دؤشَر چایین ایچینه بلکه تاپابیلسن. بیردن آیاغی بودورَر، دؤشر سویا. سو اشرفی گؤتورَر گئدر بورلاغانلاردا بوغار. ناهار اولار گلین نن خبرچیخماز محله نین اهالیسی اؤزونون عایله سی گلینجه اشرف بورلاغانلاردا سون نغمه سین اوخویار مین بئله غملی کدرلی خاطیره لر آنالارین باشینا
گلیب. یوخسوللوق قوربانی اولوبلار بو قادینین حالینا اوره گیم یانیب بویله بایاتی چاغیردیم.
چای منی آلدی گئتدی
داشلارا چالدی گئتدی
بالامدان آیری سالدی
بیرهارای سالدی گئتدی
——————
خزللندی گوی چینار
یارپاغی دینار- دینار
چای آخاردییار- دییار
منیم غمیم پایلی یار
—————
چای گلیرداشا داشا
داغلاردان آشا آشا
اوره ییمین دردینی
دئیین قوهوم قارداشا
—————–
بالام من سیز چیغیردی
ائل طایفانی چاغیردی
آناسین آختاریری
اونون دردی آغیردی
—————–
شَنلیک نَدی بیلمه دیم
بیردانیشیب گولمه دیم
یاشام قارانلیق اولدو
گونش اؤزوگورمه دیم
________
چای باشی مئشه ام اولدو
آخارسوشؤشه ام اولدو
گؤزیاشیم قوتارمادی
آغلاماق پئشه ام اولدو
—————-
هرگون صوبحون آذانی
تئزدن آسدیم قازانی
بیرآختاریب تاپایدیم
منه یازی یازانی
—————-
سولدوردولارلالانی
دردایچینده قالانی
مندن سورا دیندیرین
اوسوت اَمربالانی
—————-
یاشامدا دیل آچمادیم
قانادلانیب اوچمادیم
فلک ائوون یئخیل سین
باشیما گول ساچمادیم
—————–
قوش اوشدوبیزیم باغا
بیرسَس دؤشدویایلاغا
ائللرجسَدین تاپدی
بَزک اولدو توپراغا
————–
اوزاماندان بری اشرفین ماوی گوزلری ساری تئللری آل چیچکلی یایلیغی هر گون شافاق دؤشنده گون یئریله ویدالاشانداسویون اؤزونده گورونر میش .

۱/۱۱/۹۶

این مطلب هم بخوانید

میزیلتی/ فرانک فرید(ایپک)

ائله میزیلدانیرام هر دیله بنزه‌سین دیلیم باشا دوشن‌لرین اَلیندن اؤپه‌جه‌یم! قولاق‌لاری اوخشاییرام، پیچیلداییرام سسیم اورگیمه …

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *