خانه / زنانه ها / رقیه علیقلیان، «لاله» خانیمدان اوچ شعر
رقیه علیقلیان

رقیه علیقلیان، «لاله» خانیمدان اوچ شعر

رقیه علیقلیان، «لاله» خانیمدان اوچ شعر

ماوی گؤزلو «سمیّه»
هم یازی، هم یایی کئچیدیم آنجاق
پاییزین گونلری سیخیردی منی
کؤنلومده گیزله‌نن یاندیریجی اود
یاندیریب اودلارا یاخیردی منی

بیرعومور چالیشیب تیکدیگیم یاشام
اوزومه قارانلیق بیر زیندان اولدو
دووارلار چکمه‌دی اورَک دردیمی
قوردوغوم یاشامدا تارمار اولدو

هارایم اولمادی باجی ـ قارداشدان
دردیمی سؤیله‌دیم هامییا باشدان
دئدیلر بالان وار دؤزگینن آنجاق
سؤیله‌مه اوجادان، دئنه یاواشدان

دردیمی بیلدیلر قاپی ـ قونشولار
سینه‌مین اودلاری کؤزله‌ین زامان
مورگولو گؤزلری اویادیم سحر
قارانلیق گونشی گؤزله‌ین زامان

دوراردیم باییردا باخاردیم یئره
دردیمی سؤیلردیم گونشه، یئله
ساچلاریم اَلندی دوردوغوم یئرده
آخیردا آلیشیب، قورولدوم ائله

دئدیلر هاییف اولدو بو ماوی گؤزلو
گؤزونده دنیز تک حسرتی قالدی
ندن گون گؤرمه‌دی گئجه قوشو تک
کؤنلونده بیر عالم ایستگی قالدی.

* بوشعر قونشولوغوموزدا جانیندان دویوب اؤزون اودلایان بیر «سمیّه» آدلی بیر قادینین حاقیندا یازیلیب.

بیلمه‌دیم
جوشوب داشماق بیلمه‌دیم
قاناد آشماق بیلمه‌دیم
آغزیمدا قانلی یاشماق
کندیر آشماق بیلمه‌دیم

باش اَیدیم تاپدالاندیم
کؤهنه یول تک قالاندیم
من اَیدیم فلک سالدی
اوغولمادیم تالاندیم

سئویلمگی بیلمه‌دیم
بیر دانیشیب گولمه‌دیم
نامرده بویون اَیدیم
اورَکدن سئویلمه‌دیم

آخشامیم سحر اولدو
ایچدیگیم زهر اولدو
آدی دوست، اؤزو دوشمان
اودا مین قهر اولدو

گورَن دئدی نه شَندی
قم باغریما دؤشندی
اورَگیم یاسا باتدی
دئدیلر چک پئشندی.

قیزلار
دیری باسدیرما منی بیر یئنی جان وار منده
یوخادیر باخ اورییم اود کیمی قان وار منده

بوکمه نازلی سَسیمی بوخچالارا، بوکمه آنا
ایلدیریم گوزگوسویم اودلو فَغان وار منده

من کی ائللر قورویان اوللام ایگیدلر آناسی
منی باسدیرما آنا گولو نیشان وار منده

من بوی آتسام بوی آتار تام یاشاییش شَنلیگینن
صاباحی آیدین ائدن شوهرت ـ شان وار منده

یارانیشلار دیریدن بیر آنا اولام حایاتا
بیر بولاق تک جوشارام چوخلو تاوان وار منده

یاشماغی چک قیراغا حاق سؤزومه بیر قولاق آس
فرقیلر قاندالینی قیرماغا جان وار منده

برده‌لیکدن قاچیرام من ده بیر اینسان سایاغی
حاقیما بلکه چاتام گؤر نه گومان وار منده

بَز‌َگین آینا داراغین اوغارام وار گوجونن
گوجلو یَل تک یاشارام، قوچ گوجو جان وار منده

حوریّت‌دن اوتورو یایلیغیم آل بایراق اولار
(لاله) تک داغ دَره ده تاکی نیشان وار منده.
۱/۱۱/۹۶

این مطلب هم بخوانید

رقیه کبیری

سیزیف افسانه‌سی/ رقیه کبیری

زنان آذربایجان آذربایجان قادینلاری تیققیلتی سسی ائشیدیرسن. بوٍلورسن قوْنشونون قاپیسی ایشگیللندی. گؤزلریوی آچیرسان. بولورسن ساعات …

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *